أديبيات
حكاية المتعافي
اصلو ما ريحتني حكاية استقالة المتعافي دي..ورجعتو تاني..!!..قمنا نبحت..شمارات وكدا..يللا لقينا القصة الحصلت بالزبط..!!..زمان قلتا ليكم..لو في واحد فيكم..بقا وزير في الانقاذ دي..يختا تلاتة انفار..!!..منهم ..الفرعون..او امبراطور السدود..اسامة عبد الله..!!.اها حبيبنا المتعافي..دقس ووقف قدامو…والبقت بقت..!!

اصل الحكاية..قبل رمضان..جا السودان..سكرتير العلاقات الخارجية الصيني..في الحزب الشيوعي الصيني..اول اجتماع ليهو مع الجماعة..شبكم..قروشنا وديونكم..!!..جماعتنا..حلفوا بالتقطعن..انهم مقحطين ومافي شي..ورقدوا سلطة لي الزول..قام زاد ليهم مهلة السداد..٤ سنوات زيادة..وجماعتنا..ما شحادين وعينم قوية..!!..اشتكوا للصيني..انو الفلس مطلع عينم..الصيني ما قصر..رقعم ليك بي ٢٠٠ مليون دولار..قرض صيني جديد..!!..
يللا الفلم بدا من هنا..المتعافي طلب القروش دي..يحصل بيها الموسم الزراعي التعبان دا..وله فيها مأرب آخري..!!..والفرعون…داير القروش لشغلو بتاع السدود..والمتعافي..وقف في الموضوع الف احمر..!!..اها..اتدخل التحكيم..بشة وكدا..وقعدم..وقال للمتعافي..نحنا مرسلين..الطفل المعجزة..مصطفي عثمان..للسعودية..يشحت لينا..وان شاء الله بيدونا..والقروش البتجي..بنديك ليها..والمتعافي..عمل فيها مفتح..قال كويس..بس لغاية ما تجي قروش السعودية..قروش الصين دي..تقعد في بنك السودان..ما تتهبش..!!..والفرعون…قااااااااعد..ووافق علي شرط المتعافي دا..!!

السعوديين..استقبلوا..مستشار الشحدة..وونسوهو زيييييين..وادوهو سيف ومبخر..وودعوهو..!!

نرجع لجماعتنا ديل..والقصة القديمة زاتا..الزول البصفر للاسد!!..قالو فى زول عندو صفاره..يمشى الغابه كل يوم يصفر للاسد..الاسد يستمتع..القرود بيتفرجو ساى..!! اها قال ليك يوم بتاع الصفاره جا الغابه..!!..وشاف ليه اسد بعيد مشى عليهو..الاسد كان اطرش..!!..الزول ماشى على الاسد..والقرد بيقول للتانى الاطرش بعوقو..!!.. الاطرش بعوقو..!!صاحبنا وصل الاسد..وقعد يصفر..!!الاسد خمشو ليك قطعو حتت..!!القرد اتلفت على القرد التانى ..ماقلت ليك الاطرش بعوقو..!!..اها المتعافي..وقع مع الاطرش..!!..وما لقي ليهو قرد..قصدي كوز..يعقلوا..!!..الاطرش..قصدي الفرعون..قبل ما يجي رد السعوديين..صحا الصباح بدري..وطوالي بنك السودان..ومعاهو خطاب من الرئيس..وشفط القروش الصينية..وفتح لسدودو..!!..والمتعافي…اتدقس..!!..المشكلة انو ما بقري تاريخ كويس..!!..الاطرش دا..ضحاياهو..واليين..ومدير هيئة الكهرباء..والمناصير..!!…بفرم طوالي..وما بتكلم كتير..ناس بشة..بشبكوك شعب مجاهد وصابر..ووووو…لكن الاطرش بناولك..بي الحتة الفيها الحديدة…طااااااااخ..وما بيشتغل بيك..!!.وقد كان..!!

الحنك بتاع الاستقالة بتاعت المتعافي..دي بيسموها الخرخرة..!!..وزي ناس الكورة..التحكيم فاشل..التحكيم فاشل..لكن كان ليك يا المتعافي..!!..اتشطفتا..والكان كان..!!..في زول نصيح بقيف للاطرش..!!..بيعوقك بيعوقك..!!..غايتو التحكيم..خلا المتعافي..يرتاح شوية ويهدا..بعدداك نادوهو..وونسوهو..ورجع وزارتو..لكن..تاني كان شاف الاطرش في طريق..بيخلي ليهو..!!..في زول واعي يقيف للاطرش…!!

محمد
حكاية عمر البشير بقا ولي دي..ذكرتني قصة حقيقية حصلت في ولاية الجزيرة

..الوالي جاي من زيارة للقضارف..والسواق بحب الكورة وبشجع اهلي مدني..والكورة اليوم داك..اهلي واتحاد مدني..والسواق داير يحصل الاستاد..!!..في الفاو الوالي شبكو تقيف..عشان نصلي المغرب هنا..!!..السواق اكلا في حنانو..ونزلو..بعد الصلاة..الوالي اتشالق وبقا داير يلقي كلمة..السواق اكلتو..ساق اللاندكروزر وفتح لمدني وجلا الوالي..!!..وحضر كورتو..!!..والصباح جا لمبني الولاية..الجماعة يسألوهو..الوالي ما كان معاك..وينو؟؟..صاحبنا شبكم ليك..والله يا اخوانا..نزلنا نصلي المغرب..صلي بينا وفي السجدة الاخيرة..لقينا اختفي..!!..وخلا شالو بس في المصلاية..!!..الجماعة شبكوهو كيف يعني؟؟..قاليهم الوالي دا مبروك..كن قريب ممكن يكون هسي في مكة..!!..الجماعة شبكوهو..دي كرامات اولياء الله..!!..الوالي بعد رجع..اكلا في حنانو..شهر كدا..وشلع صاحبنا..!!..فهسي يا الكاروري..الراجل سافر في امانتين الله..يجي يلقاك بقيتو ولي…!!..بياكلا منك شهر شهرين..لكن صدقني بختها ليك…!!..صدقني احرجتا الراجل معانا هسي..!!

! و زولنا لسه قاعد

وفات بوش الاب..وجاء كلينتون..وزولنا قاعد!!..وفات كلينتون..وجاء بوش الابن..وزولنا قاعد مصنقر!!..وفات بوش الابن وجاء اوباما..وزولنا قاعد ومصنقر!!..واوباما احتمال يقعد واحتمال يمشي..مجهجه وكدا..وزولنا قاعد يعاين!!..وبن علي اتفكفك..والقذافي اتلحس..ومبارك يموت ويحيا !!..واليمني اتحرق واتفكفك..وبشار بيلم في شنطو..!!.. وبتاع اثيوبيا اتلحس..!!وزولنا قاعد ويرقص!!..دي شنو المصيبة الابتلينا بيها دي..!! الشئ التقول ملصقنو بصباع امير في الكرسي..!!!!!

! يا سلام ياخي ناس الامن ديل حنينين حنية شديدة خلاص… الحنة التقوم لينا فوق راسنا دا


يا سلااااام..ياخي..ناس الامن ديل طلعوا اولاد حلال..طلعوا الناس من المعتقل..قبل العيد..عشان يعيدو مع اهلهم..يا سلاااام ياخي..ناس راقيين وحنينين حنية شديدة..!!
الحنة التقوم لينا في راسنا نحنا ديل..!!..هو من الاول معتقلينهم لييييييه؟!!..وبدون محاكمة ولا اي حاجة..!!..سااااااي كده..!!

مشكلتنا..لينا ٢٣ سنة..ما قادرين نميز..بين حقوقنا المستحقة..والمنح التي نأخذها..يعني لما ندفع رسوم وضرائب..ونقول دايرين تعليم وصحة مجان..دا ما طلب..دا حق..والانقاذ.كراعا فوق راسا..تسوي كدا..وما حيعملوها من بيت ابوهم..!!..ولما نقول لا للحكومة..دا حقنا..ما شيتاً ناجرنو من راسنا..!!..ولا امن ولا جن احمر يعتقلنا..اكتر من شهرين..وبدون محكمة ولا يحزنون..ويمرقونا..ونقوم نقول كتر خيركم..!!..دولة فيها جهاز امن يقبضك بدون سبب..ويفكك بدون سبب..!!..ووزير يطلع قرار..وبعد ساعات الرئيس..يلغي القرار..!!..دي مفروض يسموها..جمهورية السودان الفوضوية..!!..دولة عاملة زي الملجة بتاعت الخضار..!!

يا وزير الداخلية مظاهرات تشوف..طيارات ما تشوف؟
!اي مشروع يفتتحو الرئيس البشير دا..بخستك
ridiculouslysudanese:

SILVER FOR MOHAMED ELKHEDR! MAKING OUR COUNTRY PROUD!  

=)

ridiculouslysudanese:

SILVER FOR MOHAMED ELKHEDR! 
MAKING OUR COUNTRY PROUD!  

=)

!ياعمر البشير فنش أعضاء المجلس الوطني ال400 و جيب بدالهم ببغاء


الي الرئيس..عمر البشير..
يا ريس..زمان كان عندنا..تربيزة في البيت..مضايقاني ضيق شديد..بقعدتا كدا..وكل مرة اقول للحاجة نتخارج من التربيزة..تشبكني..خليها كدا..دي محلية الصالة!!..يا ريس..ياخي..التربيزة الاسمها..المجلس الوطني..او البرلمان دي..حقو تشيلا..وتعمل المبني..متحف قومي..!!..تربيزة كل شغلتا موافقون..!!..او منافقون في رواية اخري..!!..يا ريس اصلوا البلد مفلسة وكدا..وتقشف وكدا..شيل ليك اربعمية وكسر نفر..وجيب ليك ببغاء وواحد..وحفظوا الهتاف دا..سير سير يا هناي..وطلع قرار جمهوري..يسمي الببغاء..المجلس الوطني السوداني..وريح بالك..والسلام..

!هذا ما نسميه البديل…الصحة..نموذجاً


وهذا ما نسميه البديل…الصحة..نموذجاً..

لمن يهمه امر البديل…سلام..
هي افكار..في اطار بحثنا عن جواب عن..سؤال البعض..ما هو البديل..سلسلة..نبدأها اليوم..بالصحة..ونعرج منها..الي التعليم..والزراعة..والصناعة..والاقتصاد..وغيرها..

نأخذ الصحة كمدخل..لانها تظل اصلاً..لنهضة الشعوب وعافيتها..ومعبراً للتنمية الشاملة للاوطان..فمثلاً..مرض لعين كالملاريا..ينظر له..كمرض له تأثير كبير علي الانتاج الفردي..والعام..تخيل انه لو اصيب في العام الواحد..مليون شخص..وتغيب كل واحد منهم..يوماً واحداً..قس تأثير ذلك علي اسرهم..وانتاج الدولة..واقتصادها الكلي..لذلك تظل الصحة..اولوية متقدمة من اولويات العاقلين والمهمومين بالشأن الوطني..

نذهب اكثر..ونتحدث عن ما تفعله الانقاذ حالياً..حيث تلقي للصحة..ما مقداره..١% من ميزانية الدولة العامة..لانها ليست من اولوياتها..وهذا ما يستدعي التغيير..واستعجاله..بالنسبة لمشروع كالتأمين الصحي..هو مشروع ممتاز..كفكرة..لكن التنفيذ..جعله مجرد حصالة نقدية..للدولة..ونحن نطرح..ان يبقي عليه..لكن..يتم تقليصه وجعله..هيئة ادارية صغيرة..تتولي جمع وتوزيع الاموال..للمؤسسات الصحية..كالمستشفيات..والمراكز الصحية..والهيئات الاخري..كالامدادات الدوائية..

نغوص اكثر..بعملية حسابية بسيطة..عدد سكان السودان..اليوم..يصل الي ٣٠ مليون نسمة..العاملين بالدولة..والقطاع الخاص..لنقل..لا يتجاوز عددهم..ال ٣ مليون شخص.. ولنفترض اننا حصلنا منهم علي مبلغ وقدره..٢٠ جنيهاً..كتأمين صحي..لهم ولاسرهم..اذاً شهرياً..نتحصل علي مبلغ وقدره..٦٠ مليون جنيه..مليار بالقديم..وتضاف اليه نسبة من ميزانية الدولة..لنقل ١٠%.. اوبدلاً من تضييع المبلغ بصرف غير مخطط له..يتم الصرف..وفق برنامج..سنوي او نصف سنوي..او ربع سنوي..او حتي شهري..

البرنامج او الخطة..تبدأ بالاولويات اولاً..

-الفترة الاولي..تعني بجمع المعلومات..وترتيب الاولويات..مثلاً..صيانة المستشفيات..وبناء مرافق صحية..تستوعب اعداد المرضي..وتوفير السراير..واماكن الانتظار للمرافقين..وتجهيز اقسام الطوارئ..بكل احتياجاتها..يمكن فعل كل هذا في فترة لا تتجاوز..الثلاثة اشهر..

- الفترة الثانية..تركيز الجهد في المراكز الصحية..وتجهيزها بما يلزم..متطلبات الرعاية الصحية الاولية..وتدريب الكوادر الصحية..وتحسين بيئة العمل الصحي..وتحسين رواتب العاملين بالقطاع الصحي..وهذه الفترة تمتد بين ٣ الي ٦ اشهر كحد ادني..وسنة كحد اقصي..

-الفترة الثالثة..التركيز علي اصلاح المؤسسات كالامدادات الدوائية..ودعمها..ليظهر تأثير ذلك في انخفاض اسعار الدواء..وغيره من احتياجات المرضي..واحتياجات المؤسسات الصحية..بتركيز الجهد كله في وضع سياسة للدولة تمنع وضع ضرائب او رسوم..علي المستلزمات الطبية للبلاد..وقد نذهب اكثر من ذلك..ونستغل موقعنا الجغرافي..ونبدأ في الانتاج الدوائي..لسد الاحتياج الداخلي..والتصدير للخارج..هنا الزمن من سنة الي ثلاث سنوات كحد اقصي..

- الفترة الاخيرة تكون..لانشاء مراكز بحثية..ودعم القائمة منها..للقضاء علي امراض مستوطنة كالملاريا وغيرها..مع الالتزام بفترة زمنية معينة..للوصول الي نتائج مرضية..ووضع ميزانية دائمة للصيانة وغيرها من احتياجات المؤسسات الصحية..

-كل ما سبق قوله..ينعكس اثره الفعلي في الوصول..بعد فترة لا تتجاوز ال٥ الي ٧ سنوات..الي مرحلة العلاج المجاني..لاحظ من فضلك..ان كل هذا..بعيد عن اي صرف كبير ومباشر من الدولة علي بند الصحة..بل من داخل جيوب المواطنين..وبالتالي..الدولة المحترمة..تخفض ضرائبها ورسومها علي المواطن..باعتبار انها لا تقدم كثير خدمة كالصحة..كمقابل للضرائب التي يدفعها…

هي افكار..في اطار البديل الذي نبحث عنه..ولأسالك سؤالاً مباشراً..لماذا لا تفعل هذا الانقاذ حالياً؟!!..ولماذا لن تفعله مستقبلاً؟!!..اجابتك عن هذا السؤال..هي..الفساد..اذاً..هاهي فكرة صغيرة عن ما نعني بالبديل..وهي افكار شخص واحد..ناهيك عن افكار..شعب بأكمله..تصدق فيه المقولة..شعب عملاق..يتقدمه اقزام..!!

نواصل في جانب آخر..